*ಗಝಲ್--೬*

ಹಸಿ ಇಲ್ಲ, ಹಸಿರಿಲ್ಲ ಮನಸು ಮರಳುಗಾಡಿನಂತಾಗಿದೆ ದ್ಯಾಮ.
ಎಷ್ಟೇ ಹೀರಿದರೂ ಮದಿರೆ ಏಕೋ ಮತ್ತೇರಿಸದಂತಾಗಿದೆ ದ್ಯಾಮ.

ಚಿಕ್ಕಂದಿನಿಂದ ಜೊತೆಗೂಡಿ  ಆಡಿ, ಹಾಡಿ ನಲಿದಾಡಿದ ಗೆಳೆಯನವನು.
ಅವಳಿಗಾಗಿ ಅವನ ಕಳೆದುಕೊಂಡ ಮನ ಅನಾಥವಾದಂತಾಗಿದೆ ದ್ಯಾಮ.

ಮನದಲ್ಲಿ ಬಲು ಪ್ರೀತಿಯಿಂದ ಪೂಜಿಸಿ ಆರಾಧಿಸುತ್ತಿದ್ದೆ ನಾ ಅವಳನು.
ಅವನ ಮೋಹಿಸಿಯಾಳೆಂದು ಸಂಶಯಿಸಿದ್ದು ಚೂರಿ ಇರಿದಂತಾಗಿದೆ ದ್ಯಾಮ.

ಅವನಿಂದ ಮನ ಹಗುರ,ಅವಳಿಂದ ಹೃದಯ ಹಗುರ;ಎರಡೂ ಈಗ ಭಾರ.
ನನಗೆ ಬದುಕೇ ಬೆಂಗಾಡಾಗಿ, ಬಯಸಿ ಸಾವನು ಕರೆವಂತಾಗಿದೆ ದ್ಯಾಮ.

ನನ್ನ-ಅವಳ ಬೆಸೆಯಲು ಆತ,ಅವನ ಮರಳಿಸಲವಳು, ದೂರಾದರೆ?
ಇವರಿಬ್ಬರೂ ತ್ರಿನೇತ್ರಜನಿಗಿಂತ ಅದೋ, ಬಲು ಎತ್ತರದಿ ನಿಂತಂತಾಗಿದೆ ದ್ಯಾಮ.
----------------
..✍ ತ್ರಿನೇತ್ರಜ.