ಗಝಲ್-- ೨೭

     [05/04, 8:02 p.m.]

ಎನ್ನೆದೆಯ ಹಸಿರು ತಿಳಿಗೊಳದಲ್ಲರಳಿದ ಚಿತ್ತಾರ ನೀನು|
ಅಂದದಿಂದೆನ್ನ ಮನಸೂರೆಗೊಂಡ ಮೋಹಕ ಮಂದಾರ ನೀನು||

ಶುಭ್ರವಾಗಿಹ ನೈದಿಲೆಯಂದದಿ ಅಂದು ನೀರೊಳು ಕಂಡೆ |
ಶ್ವೇತವರ್ಣೆ ನಾನಂದು ಕಂಡ ಅಪ್ಸರೆಯ ಸಾಕಾರಚಿತ್ರ ನೀನು||

ನೀರುಂಗುರಗಳ ಮೂಡಿಸುತ ಜಲದೊಳಾಡಿದ ಕನ್ಯಾ ರೂಪಸಿ |
ಎನ್ನ ಹೃದಯದೊಳು ಸಿಹಿ ಕ್ಷೋಭೆ ತಂದಿತ್ತ ಶೃಂಗಾರವೆ ನೀನು||

ಕಣ್ಣಿನಲ್ಲೇ ಅಚ್ಚಾಗಿದೆ ಆ ನಿನ್ನ ತನ್ಮಯತೆಯ ಭಾವಭಂಗಿ|
ಮೊಗವ ತೋರದೆ ಮನಗೆದ್ದ ಮಧುರ ವೈಯ್ಯಾರ ನೀನು||

ಪಚ್ಚೆಗೊಳದ ಹಂಸಿನಿಯಾ ಹೇಗೆ ಮರೆಯುವ ಈ ತ್ರಿನೇತ್ರಜ|
ವರ್ಣಪಟವಾಗಿ ಮೂಡಿನಿಂದಿಹ ಕಲಾ ಸಂಕರವಾದೆ ನೀನು||
    ..ತ್ರಿನೇತ್ರಜ..