*ಗಝಲ್-- ೧೯*

ಜೀವನದ ಪ್ರತಿದಿನದ ಪಾಠಗಳಿಗೆ ಮನ ತೆರೆದ ಬಾಗಿಲಾಗಿರಲಿ|
ತ್ರಿನೇತ್ರಜ ಹಂಚಿಹ ಹದುಳದರಿವಿಗೆ ಮನ ತೆರೆದ ಬಾಗಿಲಾಗಿರಲಿ||

ಬದುಕು ಆಳ ತಿಳಿಯದ ಸಾಗರವಲ್ಲದೆ ಮಿತಿಯುಳ್ಳ ಬಾವಿಯಲ್ಲ|
ಅವಿರಿವರು ಕಂಡ ಅನುಭವಗಳಿಗೆ ಮನ ತೆರೆದ ಬಾಗಿಲಾಗಿರಲಿ||

ಎಲ್ಲ ಬಲ್ಲೆನೆಂಬುವ ತಪ್ಪು ಕಲ್ಪನೆಯು ನೇಣ ಕುಣಿಕೆಯೋ ಕಲಿಕೆಗೆ|
ದಿಕ್ಕು ದಿಕ್ಕಿನಿಂದ ದಕ್ಕುವ ಜ್ಞಾನಗಳಿಗೆ ಮನ ತೆರೆದ ಬಾಗಿಲಾಗಿರಲಿ||

ನೋವನು ಉಚಿತ ನೀಡೋ ಮಾಯೆಯ ಸಂತೆಯೋ ಈ ಬದುಕು|
ದೀನ ಅಬಲರ ನೋವಿನ ತುಣುಕಳಿಗೆ ಮನ ತೆರೆದ ಬಾಗಿಲಾಗಿರಲಿ||

ದ್ವೇಷದ ಹೊಗೆಯಲೇ ಬೆಂಕಿಹಚ್ಚಲು ನೂರ್ಕಾಲ ಸಮಯವುಳಿದಿಲ್ಲ|
ನೆಮ್ಮದಿಗಾಗಿ ಮೂರ್ಕಾಲವೂ ಕ್ಷಮೆಗೆ ಮನ ತೆರೆದ ಬಾಗಿಲಾಗಿರಲಿ||
*******************
✍🏼 ತ್ರಿನೇತ್ರಜ್

ಶಿವಕುಮಾರ ಹಿರೇಮಠ